جگن کاظم نے علیزے شاہ کے حق میں آواز بلند کرتے ہوئے کہا کہ خدارا، ایک دکھی دل پر اور وار نہ کریں، علیزے شاہ ٹراما سے گزر رہی ہے، اسے ٹرول نہ کریں۔
پاکستانی اداکارہ اور میزبان جگن کاظم نے حال ہی میں اداکارہ علیزے شاہ کی حمایت میں ایک ویڈیو پیغام جاری کیا ہے جس میں انہوں نے علیزے شاہ کو درپیش ذہنی دباؤ، ماضی کی زیادتیوں اور سوشل میڈیا پر تنقید سے متعلق کھل کر بات کی ہے۔
ویڈیو میں جگن کاظم نے علیزے شاہ کے ساتھ اپنے جذبات کا اظہار کرتے ہوئے کہا کہ میری معافی پر علیزے کا جواب بہت مثبت تھا، میں اس کی چیٹ کے اسکرین شاٹس تو نہیں شیئر کر سکتی، لیکن وہ بہت دعائیں دینے والی اور حساس انسان ہے۔
انہوں نے کہا کہ علیزے اس وقت شدید ذہنی دباؤ اور جذباتی تکلیف کا شکار ہے اور ہم اسے مزید ٹرول کر رہے ہیں؟ وہ ابھی جوان ہے، پرانے زخم پھر سے ہرے ہو رہے ہیں، اسے ہر وہ لمحہ یاد آتا ہے جب اسے مارا گیا، مذاق اُڑایا گیا یا نشانہ بنایا گیا۔
علیزے شاہ نے جگن کاظم کی معافی کو دل سے قبول کرلیا
ان کا کہنا تھا کہ یہ سب پوسٹ ٹرامیٹک اسٹریس ڈس آرڈر (PTSD) کی علامات ہیں، میں بھی ان لوگوں میں شامل تھی جنہوں نے اسے تکلیف دی، اسی لیے میں نے معافی مانگی۔
جگن نے سوشل میڈیا صارفین کو تنقید کا نشانہ بناتے ہوئے مزید کہا کہ کیا آپ واقعی اتنے فارغ ہیں کہ کسی کی پروفائل ڈھونڈیں، اس پر نظر رکھیں اور اسے نشانہ بنائیں؟ خدارا، یہ رویہ چھوڑ دیں ہر شخص کی زندگی کا ایک ایسا پہلو ہوتا ہے جو وہ دنیا کو نہیں دکھا سکتا، اگر آپ خود کو بہتر سمجھتے ہیں تو ہی دوسروں کو ٹرول کریں۔
واضح رہے کہ چند روز قبل جگن نے ایک ویڈیو شیئر کی تھی جس میں انہوں نے علیزے شاہ سے ماضی کی غلطی پر معافی مانگی تھی، ویڈیو پر علیزے نے مثبت انداز میں جواب دیا تھا۔
