پاکستان مسلم لیگ (ن) کے سینیٹر عرفان صدیقی نے بھارتی ایئر چیف کے بیان پر گفتگو کرتے ہوئے کہا ہے کہ بھارتی فضائیہ کے سربراہ کا بیان مضحکہ خیز ہے، اس پر کیا تبصرہ کیا جائے۔
جیو نیوز کے پروگرام جیو پاکستان میں گفتگو کرتے ہوئے انہوں نے کہا کہ جنگ کو 3 ماہ گزر چکے ہیں اور بی جے پی کے رہنماؤں کے اس پر بیانات بھی آگئے ہیں۔ بھارتی فضائیہ کے سربراہ نے یہ جھوٹا بیان کیوں دیا مجھے سمجھ نہیں آئی۔
عرفان صدیقی نے کہا کہ بھارتی رہنماؤں نے جنگ کے دوسرے یا تیسرے دن ہی کہا تھا کہ ہمیں تسلیم کر لینا چاہیے اور وزیر اعظم مودی کو قوم کو بتانا چاہیے کہ ہمارے 5 طیارے گرے ہیں۔
ن لیگی سینیٹر کا کہنا تھا کہ اب اس وقت یہ بیان کیوں دیا گیا مجھے سمجھ نہیں آرہی، مودی نے پارلیمنٹ میں 1 گھنٹے سے زیادہ دیر تقریر کی مگر انہوں نے بھی کوئی ایک جملہ نہیں کہا کہ ہم نے پاکستان کے 5 طیارے مار گرائے ہیں۔
عرفان صدیقی نے کہا کہ جھوٹے شخص کا حافظہ نہیں ہوتا، شاید وہ سمجھتے ہیں کہ ان کا جھوٹ سچ سمجھا جا رہا ہے۔
ان کا کہنا تھا کہ بھارتی اپوزیشن جماعت کانگریس کے رہنما راہول گاندھی نے دو دن سے پریس کانفرنس میں انتخابات میں نریندر مودی کی جیت پر سوال اٹھایا ہے۔ ایسا پہلی بار ہوا ہے کہ بھارتی انتخابات پر دھاندلی کے الزامات لگے ہیں۔ اس کا بھی مودی کے اوپر بہت بڑا دباؤ پڑا ہے۔
انہوں نے کہا کہ خارجی سطح پر بھی مودی حکومت کی رسوائی ہو رہی ہے، کسی ایک نے بھی پہلگام کے حوالے سے بھارتی مؤقف کو تسلیم نہیں کیا۔
عرفان صدیقی کا کہنا تھا کہ بھارتی ریاست بہار میں اگر بی جے پی الیکشن ہار جاتی ہے تو اس کی پوزیشن کمزور ہو جائے گی، بی جے پی بہت مشکل میں ہے، بی جے پی نے خود اپنے پاؤں پر کلہاڑی ماری ہے۔
مسلم لیگ ن کے رہنما نے کہا کہ 9 مئی کے کیسز سیاسی نہیں، جرائم کے کیسز ہیں، 9 مئی کے کیسز میں سزائیں ہو رہی ہیں، سب کا فوکس اس بات پر ہے کہ سزائیں کس کو ہو رہی ہیں، 9 مئی کے واقعات پس پردہ چلے گئے ہیں۔
ان کا یہ بھی کہنا تھا کہ سزا پانے والوں کے پاس اپیل کے مواقع ہیں، بھارت، امریکا یا برطانیہ میں کوئی جماعت ایسا کرتی تو پتہ نہیں کیا کچھ ہوچکا ہوتا۔
واضح رہے کہ دو روز قبل بھارتی ایئر چیف نے پاک بھارت جنگ میں ذلت آمیز شکست کے تین ماہ بعد بنا ثبوت 6 پاکستانی طیارے تباہ کرنے کا دعویٰ کیا تھا۔
ایئر چیف مارشل اے پی سنگھ نے بھارت کے لیے عالمی ہزیمت کا سبب بننے والی چار روزہ جنگ میں پاکستان کے 5 لڑاکا طیاروں سمیت 6 طیارے تباہ کرنے کا دعویٰ کیا تھا۔
بھارتی ایئرچیف نے دعویٰ کیا تھا کہ بھارتی فضائیہ نے پاکستان کی ایئر فیلڈز کو نشانہ بنا کر وہاں کھڑے طیاروں کو تباہ کیا۔
