پاکستانی ڈرامہ انڈسٹری کے نامور اور سینئر میزبان و اداکار توثیق حیدر غیر شادی شدہ مرد و خواتین کے ساتھ معاشرے کے منافقانہ سلوک پر بول پڑے۔
حال ہی میں سینیئر میزبان نے ایک پوڈکاسٹ میں شرکت کی جہاں انہوں نے مختلف امور سمیت معاشرے کے دوہرے معیار کو اُجاگر کیا۔
انہوں نے کہا کہ میں نے یہ محسوس کیا ہے کہ جب مرد شادی نہیں کرتا تو یہ تاثر پیش کیا جاتا ہے کہ اس نے اپنی مرضی سے شادی نہ کرنے کا انتخاب کیا ہے جبکہ خواتین کے لیے ایسا تاثر پیش کیا جاتا ہے کہ ان کی شادی ہو نہیں سکی۔
انہوں نے کہا کہ ہم جب بھی کسی مرد کے بارے میں بات کریں گے تو کہیں گے کہ آپ نے شادی نہیں کی، جبکہ یہی بات کسی خاتون کے لیے کی جائے گی تو کہا جائے گا کہ فلاں کی شادی نہیں ہوئی۔
محبت کی کہانی مکمل اور جاری رکھنے کیلئے شادی نہیں کرنی چاہیے: توثیق حیدر
توثیق حیدر نے زور دیتے ہوئے کہا کہ مرد نے نہیں کی اور عورت کی نہیں ہوئی، ممکن ہے کہ مرد کی نہیں ہوئی ہو۔
ان کا کہنا تھا کہ آج تک کسی نے مجھ سے میرا دکھ پوچھا ہے؟ کیا پتہ میری شادی نہیں ہوئی ہو۔ اسی طرح ممکن ہے کہ خواتین نے اپنی مرضی سے نہ کی ہو، لیکن اسے بیچاری بنا دیا جاتا ہے۔
سینئر اداکار نے بتایا کہ میں نے اپنے وقت میں کسی کو ڈھونڈا لیکن میری ان سے شادی ہو نہیں سکی، بعدازاں زندگی میں کیرئیر پر توجہ مرکوز کر دی۔
انہوں نے اس بات پر بھی زور دیا کہ عمر نکلنے کے ڈر سے شادی نہیں کرنی چاہیے بلکہ شادی اس وقت اور اس شخص سے کرنی چاہیے جس سے مل کے لگے کہ اس کے بغیر زندگی ادھوری ہے۔
