علیزے شاہ اور منسا ملک کا جھگڑا شدت اختیار کر گیا، منسا ملک نے ہتک عزت کا نوٹس بھجوادیا ہے جس میں علیزے سے معافی مانگنے کا مطالبہ کیا گیا ہے۔
اداکارہ اور ماڈل علیزے شاہ اپنے مختصر مگر متنازع کیریئر میں کئی بار خبروں کی زینت بن چکی ہیں، حال ہی میں انہوں نے اپنے سوشل میڈیا پر ان تمام افراد کو تنقید کا نشانہ بنایا جنہوں نے مبینہ طور پر انہیں نقصان پہنچایا، جس میں اداکارہ منسا ملک بھی شامل ہیں۔
علیزے شاہ اور منسا ملک ایک ڈرامے میں ایک ساتھ کام کر رہی تھیں جہاں مبینہ طور پر دونوں کے درمیان جھگڑا ہوا، علیزے کے مطابق منسا نے پہلے انہیں تھپڑ مارا جس کے جواب میں انہوں نے غصے میں اپنی چپل منسا کے سر پر دے ماری۔
منسا ملک مجھے جان سے مارنے کی دھمکیاں دے رہی ہیں: علیزے شاہ
منسا نے علیزے پر الزام عائد کیا اور پولیس تک معاملہ پہنچایا، جبکہ پروڈیوسرز نے علیزے کو خاموش رہنے کا مشورہ دیا تاکہ ڈرامہ مکمل ہو سکے۔
اب منسا ملک نے علیزے شاہ کو ہتکِ عزت کا قانونی نوٹس بھجوا دیا ہے، نوٹس میں علیزے سے 48 گھنٹوں کے اندر معافی مانگنے کا مطالبہ کیا گیا ہے، بصورت دیگر قانونی کارروائی کی دھمکی دی گئی ہے۔
علیزے شاہ نے یہ نوٹس اپنی انسٹاگرام اسٹوری پر بھی شیئر کیا ہے۔
انٹرنیٹ صارفین بھی اس تنازعے پر اپنی رائے دے رہے ہیں، ایک صارف نے لکھا کہ پہلی بار ایسا ہوا ہے کہ سمجھ نہیں آ رہا کس کا ساتھ دیا جائے، جبکہ ایک اور نے طنزیہ انداز میں کہا کہ کیا وہ خبروں میں رہنے کے لیے نوٹس بھیج رہی ہیں؟
