طلحہ انجم کنسرٹ میں آپے سے باہر

طلحہ انجم کنسرٹ میں آپے سے باہر ہوگئے جس کے بعد سوشل میڈیا پر عوام کا شدید ردِعمل سامنے آیا ہے۔

معروف ریپر اور گلوکار طلحہ انجم نوجوان نسل کے مقبول ترین فنکاروں میں شمار ہوتے ہیں۔

 طلحہ انجم اپنی منفرد موسیقی، اسٹائل اور غیر متوقع مزاج کی وجہ سے شہرت رکھتے ہیں، ان کے کنسرٹس اکثر ہنگامہ خیز ہوتے ہیں اور مداحوں کے غیر ذمہ دار رویے کے باعث کئی بار ناخوشگوار واقعات بھی رونما ہوچکے ہیں۔

دو روز قبل ایک کنسرٹ میں مداح نے طلحہ انجم پر بوتل پھینکی، اس واقعے پر طلحہ انجم کا پارہ ہائی ہوگیا، انہوں نے اسٹیج پر ہی اس شخص کو للکارا اور بعد ازاں اسے بالوں سے پکڑ کر اسٹیج پر گھسیٹ لیا، سیکیورٹی اور منیجمنٹ نے اس شخص کو ہجوم سے نکال دیا۔

سوشل میڈیا پر اس واقعے پر عوام نے مختلف آراء کا اظہار کیا ہے، کچھ افراد نے طلحہ انجم کے ردِعمل کو جائز قرار دیا جبکہ دیگر نے ان کے رویے کو غیر مناسب کہا۔

ایک صارف نے لکھا کہ اگر فنکار کو عزت دی جائے تو وہ بھی عزت دیتا ہے، طلحہ نے بالکل صحیح کیا جبکہ ایک اور صارف نے کہا لگتا ہے یہ ہر کنسرٹ میں جان بوجھ کر ایسا کرتا ہے تاکہ ویڈیوز وائرل ہوں۔

ایک اور کمنٹ میں کہا گیا کہ طلحہ کے ہر کنسرٹ میں کوئی نہ کوئی ایسا واقعہ کیوں ہوتا ہے؟ کیا یہ خود کو خبروں میں رکھنے کا طریقہ ہے؟