صنم چوہدری نے مداحوں کو خوشخبری سناتے ہوئے کہا ہے کہ حجاب کے ساتھ ڈراموں میں واپسی ممکن ہوسکتی ہے۔
سابقہ پاکستانی اداکارہ اور سوشل میڈیا انفلوئنسر صنم چوہدری نے کچھ برس قبل شادی اور روحانی سفر کے بعد شوبز سے کنارہ کشی اختیار کرلی تھی۔
ہمارے لیے دین کا علم زیادہ ضروری ہے: صنم چوہدری
صنم نے گلوکار سومی چوہان سے شادی کی اور اب وہ دو بچوں، ایک بیٹی اور ایک بیٹے کی ماں ہیں، وہ اس وقت اسلامی تعلیمات کی طالبہ ہیں اور انسٹاگرام پر اپنے 2.6 ملین فالورز کے ساتھ قرآن کی خوبصورت آیات اور دینی پیغامات شیئر کرتی رہتی ہیں۔
صنم چوہدری نے کئی مقبول ڈراموں میں اپنی اداکاری کا لوہا منوایا تھا۔
آج صنم چوہدری نے اپنے انسٹاگرام اکاؤنٹ پر ایک سوال و جواب کا سیشن کیا، جہاں ایک مداح نے ان سے پوچھا کہ کیا آپ حجاب کے ساتھ ڈرامہ انڈسٹری میں واپس آئیں گی؟
اس پر صنم چوہدری نے جواب دیا کہ میں واپس آ سکتی ہوں اگر ڈرامہ ایسا ہو جس کا پیغام لوگوں کو اللّٰہ کے قریب کرے اور اگر مجھے اپنی حدود کے اندر کام کرنے دیا جائے مکمل حجاب کے ساتھ۔
مداحوں نے صنم کے اس جواب کو سراہا۔ ایک صارف نے لکھا کہ ایسی باحجاب اور باکردار واپسی خوش آئند ہوگی، ایک اور صارف کا کہنا ہے کہ ڈرامہ انڈسٹری میں ایسے مثبت کرداروں کی ضرورت ہے، صنم کی واپسی کا انتظار رہے گا۔
