بلوچستان حکومت نے یکم سے دس محرم الحرام کے دوران کوئٹہ سمیت صوبے کے 8 اضلاع میں دفعہ 144 کے تحت مختلف پابندیاں عائد کر دی ہیں۔
محکمۂ داخلہ بلوچستان کے نوٹیفکیشن کے مطابق یکم محرم الحرام سے 10 محرم الحرام تک نصیرآباد، جعفرآباد، صحبت پور، جھل مگسی، استا محمد، کچھی، سبی اور کوئٹہ شہر میں مختلف پابندیاں عائد رہیں گی جن میں تمام اقسام کے اسلحہ کی نمائش، موٹرسائیکل کی ڈبل سواری، نفرت انگیز کتب، رسائل، سی ڈیز اور کیسٹس کی نمائش و فروخت پر مکمل پابندی ہوگی۔
اسی طرح محرم الحرام کے جلوسوں کے راستوں پر غیر متعلقہ اور مشکوک افراد کے داخلے، دیواروں پر چاکنگ اور پوسٹرز لگانے، چھتوں و کھڑکیوں پر کھڑے ہونے، دیگر شہروں سے آنے والے ذاکرین، علماء اور اشتعال انگیز مقررین کے داخلے پر بھی پابندی عائد کردی گئی ہے۔
محرم الحرام، فول پروف سیکیورٹی کیلئے اضافی نفری اضلاع کو دیدی گئی، آئی جی
محکمۂ داخلہ کے مطابق محرم کے جلوسوں اور مجالس کے سوا پانچ یا پانچ سے زائد افراد کے اجتماع پر بھی پابندی ہوگی جبکہ امام بارگاہوں اور جلوس کے راستوں کے اطراف بغیر اجازت دکانیں، خیمے یا مکانات کرائے پر دینا بھی ممنوع قرار دیا گیا ہے۔
سڑکوں پر بھیک مانگنے پر بھی مکمل طور پر پابندی عائد کردی گئی ہے۔
