کیپیٹل ڈیولپمنٹ اتھارٹی (سی ڈی اے) نے ایف نائن پارک کو کرکٹ اسٹیڈیم کی تعمیر کے لیے منتخب کر لیا۔
ذرائع کے مطابق سی ڈی اے نے کرکٹ اسٹیڈیم کی تعمیر کی ماہرانہ رائے کے لیے راشد لطیف کو آن بورڈ لے لیا۔
اسٹیڈیم ڈیزائن اور تکنیکی پہلوؤں کے حوالے سے راشد لطیف سی ڈی اے کو معاونت فراہم کریں گے۔ راشد لطیف نے اس سے قبل اسلام آباد کلب کی تعمیر میں اہم کردار ادا کیا تھا۔
گرین ایریا پر سپریم کورٹ کے فیصلے کے باعث کرکٹ اسٹیڈیم کی تعمیر کے لیے قانونی رکاوٹوں کو بھی مدنظر رکھا جائے گا، کرکٹ اسٹیڈیم میں بیشتر حصے کو گرین ایریا رکھنے کی تجویز زیر غور ہے۔
ذرائع کے مطابق جنوبی افریقہ، ویسٹ انڈیز میں کرکٹ اسٹیڈیمز کی طرح چند اینکلوژرز میں گرین ایریا رکھا جائے گا، سی ڈی اے کی جانب سے کرکٹ اسٹیڈیم کی تعمیر کی کلیئرنس کے لیے سپریم کورٹ سے بھی رجوع کیا جا سکتا ہے۔
واضح رہے کہ اس سے قبل سپریم کورٹ نے شکرپڑیاں میں کرکٹ اسٹیڈیم کی تعمیر کو روک دیا تھا۔
