ہلک ہوگن کی موت کی وجہ سامنے آگئی

معروف پروفیشنل امریکی ریسلر  ہلک ہوگن کی موت کی وجہ سامنے آگئی۔

 ہلک ہوگن کا اصل نام ٹیری جین بولیا تھا، وہ 71 سال کی عمر میں 24 جولائی کو چل بسے تھے۔

پنلاس کاؤنٹی کے فرانزک سائنس سینٹر کی دستاویزات کے مطابق ان کی موت کی تصدیق شدہ وجہ شدید دل کا دورہ (Acute Myocardial Infarction) تھی، جسے عام طور پر ہارٹ اٹیک کہا جاتا ہے۔

طبی رپورٹس کے مطابق ہلک ہوگن کے دل کے پٹھوں کو خون کی روانی میں اچانک رکاوٹ پیدا ہوئی، جس کے باعث ٹشو کو نقصان پہنچا، مزید یہ کہ انہیں دل کی ایک بیماری ایٹریئل فبریلیشن لاحق تھی، جس میں دل کی دھڑکن بے ترتیب اور تیز ہو جاتی ہے۔

دستاویزات میں انکشاف کیا گیا کہ ہلک ہوگن کینسر کی ایک قسم کرونک لمفوسائٹک لیوکیمیا کا بھی شکار تھے، جو سفید خون کے خلیات (لیمفوسائٹس) کو متاثر کرتی ہے، یہ بات ان کے مداحوں کے لیے حیران کن تھی کیونکہ ان کی بیماری سے متعلق معلومات پہلے کبھی منظر عام پر نہیں آئیں۔

ہلک ہوگن کے مداح دنیا بھر میں ان کی موت پر افسردہ ہیں اور ان کے شاندار کیریئر کو خراج عقیدت پیش کر رہے ہیں۔