اداکارہ و میزبان حنا بیات نے حال ہی میں ایک شو میں شرکت کے دوران ماں باپ کو الزام دینے کے رویے پر کھل کر تنقید کی ہے۔
ذہانت، وقار اور گہرے سماجی شعور کی حامل حنا بیات نے ہمیشہ معاشرتی موضوعات پر مدلل رائے دی اور اسی انداز میں انہوں نے اس بار بھی نوجوان نسل کو آئینہ دکھایا ہے۔
نجی ٹی وی کے ایک پروگرام میں گفتگو کرتے ہوئے حنا بیات نے ذہنی صحت، ماضی کے صدمات، تھراپی اور خود کو بہتر بنانے پر تفصیل سے بات کی۔
ان کا کہنا تھا کہ تھراپی کا مطلب صرف یہ نہیں کہ آپ ہر دکھ کا الزام اپنے والدین پر ڈال کر بری الذمہ ہوجائیں۔
نوجوان نسل میں تعلقات کے بگاڑ پر منزہ عارف اور حنا بیات نے اپنے خیالات کا اظہار کردیا
انہوں نے اس بات پر زور دیا کہ والدین کی پرورش، محنت اور قربانیوں کو یکسر نظر انداز کر دینا ناشکری اور ناپختگی کی علامت ہے۔
حنا بیات نے دوٹوک پیغام میں کہا کہ ہاں! آپ کے ماضی کے تجربات اہم ہیں، لیکن یہ بھی حقیقت ہے کہ وہی والدین آپ کو اس مقام تک لائے، بالغ ہونے کے بعد انسان کو چاہیے کہ وہ ماضی سے آگے بڑھے، خود کو سنوارے اور تھراپی سے واقعی فائدہ اٹھائے نہ کہ اُسے ماں باپ کے خلاف زہر نکالنے کا ذریعہ بنائے۔
حنا بیات نے یہ بھی کہا کہ اگر ڈاکٹر دوا تجویز کرے تو شرم محسوس کیے بغیر اسے استعمال کرنا چاہیے، کیونکہ ذہنی صحت جسمانی صحت جتنی ہی اہم ہے۔
حنا بیات کا کہنا تھا کہ ماں باپ کا مقام کبھی فراموش نہ کریں، کیونکہ وہی آپ کی بنیاد ہوتے ہیں۔
