کراچی کے علاقے ڈیفنس میں ایک بنگلے میں کام کرنے والی ملازمہ کو 5 کروڑ روپے چوری کرنے کے الزام میں گرفتار کر لیا گیا۔
پولیس نے دعویٰ کیا کہ ملزمہ نے ملازمت کے دوران 5 کروڑ روپے چوری کرنے کا اعتراف بھی کیا، ملازمہ 2013ء سے ڈیفنس فیز 5 کے بنگلے میں کام کرتی تھی۔
دوسری جانب مدعی مقدمے کا کہنا ہے کہ 13 سال سے خاتون گھر میں ملازمت کر رہی تھی، ملازمہ نے 5 کروڑ روپے کی رقم چوری کی ہے، شوہر بیرونِ ملک مقیم ہیں اور وہیں کاروبار کرتے ہیں۔
پولیس حکام کے مطابق ملزمہ نے چوری کے پیسوں سے گزری میں 50 لاکھ روپے کا فلیٹ، پنجاب میں 36 لاکھ مالیت کے دو پلاٹ، ایک کروڑ کی گاڑیاں اور 70 لاکھ کی دکانیں بھی خریدیں، ملزمہ سے گاڑیاں، موٹر سائیکلیں اور 46 لاکھ نقدی برآمد کر کے دکانوں اور فلیٹس کو سیل کردیا گیا۔
پولیس کا کہنا ہے کہ خاتون اکیلے ہی یہ ساری کارروائیاں کرتی تھی۔
پولیس کے مطابق کلفٹن تھانے میں بنگلے کی مالکن کی مدعیت میں ملزمہ کے خلاف 16 جون کو مقدمہ درج کیا گیا تھا۔
