مرزا اختیار بیگ کا رینٹل انکم پر 4 فیصد ٹیکس میں کمی کا مطالبہ

پیپلز پارٹی کے رکن قومی اسمبلی مرزا اختیار بیگ نے رینٹل انکم پر 4 فیصد ٹیکس میں کمی کا مطالبہ کردیا۔

قومی اسمبلی کی قائمہ کمیٹی برائے خزانہ نے کمرشل پراپرٹی پر 4 فیصد رینٹل مقرر کرنے کی تجویز مسترد کردی۔

کمیٹی اجلاس میں کمرشل پراپرٹی کی سالانہ رینٹل انکم پر 4 فیصد ٹیکس لگانے کی تجویز پر غور کیا گیا۔

اس دوران مرزا اختیار بیگ نے کہا کہ رینٹل انکم پر 4 فیصد ٹیکس کو کم کیا جائے جبکہ نوید قمر نے کہا کہ اس قانون پر نظرثانی کی گنجائش بھی رکھی جائے۔

چیئرمین ایف بی آر نے جواب دیا کہ اس کو کم نہیں کیا جا سکتا، پہلے ٹیکس افسران کے پاس رینٹل مقرر کرنےکا اختیار تھا، اگر کمیٹی اختیار نہیں دینا چاہتی تو ہم اپنی تجویز واپس لے لیتے ہیں۔

اجلاس میں اسامہ میلہ نے کہا کہ شہروں میں تو رینٹل 4 فیصد ہوسکتا ہے مگر دیہات کےلیے مشکل ہے۔

اس پر چیئرمین ایف بی آر نے کہا کہ اس کو ایک دفعہ چلنے تو دیں، اگر اچھا نہ ہوا تو آئندہ مالی سال ترامیم کردیں گے، ایف بی آر کے پراپرٹی ریٹس ڈی سی ریٹس سے بہت بہتر ہیں۔